Äänestusinformasuuni
Syyskuun 13. päivänä on vaalit valtiopäivile, rekiuuni-, ja kunnanvaltuusthoon
Äänestysinformasuuni
Äänestyslukaalit tuleva vaalipäivänä olheen auki klo. 8-20. Jos sie saat äänestää niin sulle tullee äänestyskortti postissa eli tikitaalisesti viimesthään 26. septemperiä. Lue sinun äänestyskortista missä sie piät äänestää vaalipäivänä. Muista ottaa matkhaan sinun id-kortti.
Äänestä etukätheen
26. aykystia lähtien sie saatat äänestää etukätheen Pajalan kunnassa eli muussa paikkakunnassa Ruottissa. Muista ottaa matkhaan sinun äänestyskortti ja id-kortti.
Uusi äänestyskortti
Jos sie et ole saanu äänestyskorttia postin kautta eli tikitaalisesti ja tarttet uuen kortin, ota yhteyttä kunnan kans telefooninumerolla 0978-120 78, 121 11 eli meilaa val@pajala.se.
Äänestä eustajan (ombud) kautta
Jos olet siukka, toimintarajotettu eli korkeaikänen ja et pääse äänestyspaikoile niin saatat äänestää eustajan kautta. Silloin tarttee olla yks toistaja. Eustaja saattaa olla joku omhainen eli joku muu joka pruukaa auttaa sinua. Maaseuvun postimies (lantbrevbärare) saattaa olla eustaja ja sillä oon matkassa tavaroita ette sie saatat äänestää.
Vaalilautakunnala on kiertäviä äänenvasthaanottajia jokka saattavat tulla sinun kotia jos sie saihrauen takia et pääse äänestyspaikale ja ei ole maholisuutta äänestää eustajan kautta. Jos halvaat apua kiertävältä äänenvasthaanottajalta eli jos tarttet saaja materiaalia eustajaäänestyksele, ota yhteyttä telefooninumehroon 0978-120 78, 121 11 eli meilaa val@pajala.se.
Lissää vaalista www.val.se
